Vikundi vya Masuala ya Afya

Kabla hujaanzisha jumuiya, bainisha unalokusudia - je, ni kuratibu na kusimamia mipango ya afya ya umma, kutoa mafunzo na ushauri kwa wahudumu wa afya, kutoa hamasisho kuhusu suala fulani la afya, au kitu kingine? Lengo lako litakusaidia kubainisha wahusika utakaowajumuisha kwenye jumuiya na ni vikundi gani wataingia. Unaweza kuanzisha au kuongeza vikundi vifuatavyo:

• vikundi vya wahudumu wa afya kulingana na eneo la kijiografia;
• vikundi vya wahudumu wa afya kulingana na ujuzi wao;
• vikundi vya wahudumu wa afya kulingana na mpango au matatizo ya afya wanayoshughulikia;
• wahudumu wapya wa afya wanaopokea mafunzo ya msingi;
• mafunzo yanayoendelea ya wahudumu wa afya;
• wasimamizi au waratibu wa mipango;
• timu ya wasimamizi wa hospitali;
• timu za watoa huduma wa afya – madaktari, wauguzi, wahudumu wa afya ya kijamii;
• kikundi cha dawa na vifaa vya matibabu;
• viongozi wa jumuiya.

Kuwa na lengo bayana la jumuiya kutawasaidia wasimamizi wako na wanajumuiya kuelewa sababu za kuongezwa au kutoongezwa kwenye vikundi fulani. Kwa mfano, ikiwa lengo la jumuiya ni kuelimisha kuhusu afya na kutoa huduma muhimu za afya kwa familia, unaweza kuanzisha au kuongeza vikundi vya wataalamu wa masuala ya uzazi na afya ya watoto wachanga, au ushauri nasaha kuhusu afya ya kiakili. Unaweza pia kujumuisha kikundi cha kushiriki mafanikio au kujadili suluhu kuhusiana na changamoto zilizoikabili jamii. Hata hivyo, hufai kujumuisha vikundi visivyohusiana na masuala ya afya kwenye jumuiya yako.

Wasimamizi wa jumuiya wana jukumu muhimu katika kudumisha mazingira mazuri na salama ambapo wanajumuiya wanaweza kuwasiliana, kushiriki changamoto zao, na kufurahia mafanikio yao. Kwa kubuni na kutekeleza Kanuni inayostahiki ya Maadili katika Jumuiya yako kwenye WhatsApp, unaweza kuhimiza ustawi na heshima. Kanuni ya Maadili inajumuisha sheria, masharti, na maadili yanayoongoza jumuiya yako kufahamu tabia na maudhui yanayoruhusiwa au yasiyoruhusiwa kwenye jumuiya.

Kuna hatari kadhaa unazopaswa kutahadhari wakati unapodhibiti vikundi vya watu wengi mtandaoni. Linda jumuiya yako kwa kutoa mwongozo wa kina kwa wasimamizi wa jumuiya na wa vikundi kuhusu:

• Viungo vya Mwaliko wa Kikundi na Wanakikundi Wapya - Viungo vya mwaliko vitakufaa sana kwa vikundi vya mpango vinavyobadilika kila wakati. Hata hivyo, viungo vinapaswa tu kutumwa moja kwa moja kwa wanakikundi lengwa kupitia ujumbe wa faragha, pamoja na ilani ya kuonya dhidi ya kusambaza kwa wengine wasiohusika. Shirikiana na wasimamizi wa jumuiya na wa vikundi kufuatilia na kumwondoa haraka yeyote asiyetambulika.
• Kushiriki maelezo nyeti na ya faragha. Kanuni ya Maadili au sheria za jumuiya zinawazuia wanajumuiya kushiriki taarifa zao binafsi au maelezo ya kibinafsi ya mtu mwingine, kama vile anwani ya mahali au anwani ya barua pepe, na maelezo husika. Katika kanuni ya maadili, dokeza kuwa wanakikundi hawapaswi kushiriki maelezo fulani kwenye jumuiya nzima. Iwapo maelezo au taarifa nyeti za kibinafsi zinashirikiwa kwenye kikundi cha usaidizi, washauri wanakikundi watumie ujumbe unaotoweka.
• Habari potovu. Wahudumu wa afya wa umma wapo kwenye mstari wa mbele hivyo mara nyingi wao hukumbana na habari potovu katika jamii zao na miongoni mwa wanaopokea misaada. Hakikisha wasimamizi wa jumuiya na wa vikundi wanaweza kuwasaidia wanajumuiya kuthibitisha ukweli, na kuchukua hatua haraka ili kukomesha kuenea kwa ulaghai na habari potovu kwa kufuta ujumbe. Wasimamizi wa vikundi wanaweza kubadilisha kwa muda mipangilio ya “Tuma Ujumbe” kuwa ya “Wasimamizi Pekee” ili kuwazuia wanakikundi kutuma ujumbe.
• Kudhibiti migogoro. Tofauti za kibinafsi, mitazamo, maoni na matarajio zinaweza kusababisha migogoro, hasa ikiwa wahudumu wa afya wa umma, watoa huduma za afya, na wasimamizi wa hospitali wanatoka katika jamii mbalimbali zenye tamaduni tofauti. Ni muhimu kudumisha utofauti kupitia sheria na desturi za jumuiya, na kuwapa wasimamizi wa vikundi mwongozo na mafunzo kuhusu kudhibiti migogoro.

Katika jumuiya zinazohusiana na masuala ya afya ya umma, kunapaswa kuwepo na utaratibu maalum wa kuwateua wasimamizi wa jumuiya na wa vikundi, kuwasiliana na kuratibu shughuli miongoni mwa wasimamizi, na kuwajibika kwa wasimamizi wa vikundi katika kudhibiti vikundi vyao.

Ni vyema kuwachagua wasimamizi wa jumuiya miongoni mwa viongozi, wakuu, au wanaoshikilia nyadhifa mahususi kati ya wanajumuiya mbalimbali – kwa mfano, wakuu wa afya ya umma walio na ujuzi tofauti, wakuu wa hospitali, au wakuu wa wauguzi. Pia, angalia ujuzi na ufikiaji wa maelezo ambao msimamizi atahitaji ili kuhakikisha kuwa kuna mtiririko mzuri wa mawasiliano na kwamba yanayoshirikiwa ni muhimu kwa wanajumuiya. Kwa kuwa kila msimamizi anapatikana wakati tofauti na ana majukumu mbalimbali, ni muhimu kuteua wasimamizi wa kutosha wa vikundi ili mgawane majukumu, uepuke uchovu uliokithiri, na uhakikishe jumuiya yako ni endelevu. Unaweza kuteua angalau wasimamizi wawili wa jumuiya na wawili kwa kila kikundi, kisha uanzishe Kikundi cha Wasimamizi Pekee kwa madhumuni ya kuwasiliana, kuratibu na kutoa usaidizi kwa wasimamizi ili waweze kutekeleza majukumu yao.

Unapochagua msimamizi wa jumuiya au wa kikundi, teua mtu ambaye:

• anazingatia malengo na Kanuni ya Maadili ya jumuiya;
• anatangamana na watu kwa urahisi, anapenda watu, na ni mstahimilivu;
• ana muda na uwezo wa kuratibu na kusimamia kikundi;
• ana uzoefu na ujuzi unaohitajika katika kuwasaidia wanajumuiya katika vikundi vyao;
• ana nafasi ya kuwasiliana na kukutana nawe na wasimamizi wengine mara kwa mara ili kushiriki mafunzo, mbinu bora, picha, simulizi au data.

Ili kuwashirikisha wanajumuiya, ni muhimu kuhakikisha kwamba kinachoshirikiwa kwenye kikundi cha Matangazo ni muhimu na kinawahusu watu wote. Hii inaweza kujumuisha matangazo kuhusu:

• matukio ya hivi majuzi au yaliyoratibiwa ya kuwapima watu, kutoa chanjo, na kuhamasisha umma kuhusu afya;
• maelezo kuhusu afya ya jamii, na taarifa kutoka kwa mashirika ya afya ya eneo lenu;
• matakwa na mafunzo kwa ajili ya mipango mipya ya afya ya umma;
• ustawi wa wahudumu wa afya na nyenzo za usaidizi;
• kuwatambua na kuwashukuru wahudumu binafsi wa afya.

Ni vyema kuzingatia madhumuni ya vikundi mbalimbali vilivyo kwenye jumuiya. Kutegemea malengo ya kikundi, unaweza kushirikiana na wasimamizi kutoa mwongozo kwa wanakikundi kuhusu watakachozungumzia, jinsi ya kuwasiliana, na mara ambazo wanapaswa kuchapisha maudhui. Huenda ikawa muhimu:

• kutuma ratiba za mikutano ya vikundi au vipindi vya ushauri;
• kutuma fomu na vikumbusho kuhusu kuhifadhi rekodi na kuwasilisha ripoti;
• kushiriki desturi au taratibu zinazofaa zitakazowasaidia wanaopokea misaada, wagonjwa, na wahudumu wa afya;
• kutuma ujumbe kwa vikundi vya wahudumu wa afya ili kuuliza maoni yao au kujibu maswali wanayouliza mara kwa mara;
• kushiriki mafanikio au kuwasilisha maombi ya dharura kwa wasimamizi wa hospitali;
• kutuma ripoti, maswali na maombi kuhusu matibabu ya wagonjwa na hali ya afya ya wanajamii kwa watoa huduma wa afya.

Kuwatambua wahudumu wa afya na kuwa na uhusiano wa karibu nao ni muhimu katika kuwapa motisha na kuwafanya wahisi unawaunga mkono. Onyesha kuwa unawadhamini wahusika kwa kuwataja kupitia alama ya @ kutokana na mchango wao, na kusherehekea mafanikio na matukio muhimu kwa kushiriki picha na simulizi. Waulize wanajumuiya maoni kuhusu maudhui wanayochukulia kuwa muhimu na yale ambayo wangependa kuona zaidi. Wasimamizi wa jumuiya na wa vikundi wanaweza pia kujadiliana katika kikundi cha Wasimamizi Pekee kuhusu mafanikio na changamoto, vikundi ambavyo wanafaa kuongeza au kuondoa ili mazungumzo yafanyike kwa ufanisi zaidi, na kubaini ikiwa matangazo fulani yanapaswa kushirikiwa katika kikundi au kwenye jumuiya.