ہیلتھ گروپس

اپنی کمیونٹی سیٹ اپ کرنے سے پہلے، اپنے مقصد پر غور کریں - کیا یہ کمیونٹی ہیلتھ پروگراموں کو مربوط اور نگرانی کرنا ہے، کمیونٹی ہیلتھ ورکرز کو ٹریننگ اور رہنمائی فراہم کرنا ہے، صحت کے مسئلے کے بارے میں بیداری پیدا کرنا ہے، یا کچھ اور؟ آپ کا مقصد آپ کو یہ فیصلہ کرنے میں مدد کرے گا کہ کن ممبرز کو کمیونٹی میں شامل کرنا ہے اور وہ کن گروپس میں ہوں گے۔ آپ مندرجہ ذیل کے لیے گروپس بنا یا شامل کر سکتے ہیں:

• جغرافیائی علاقے کے لحاظ سے کمیونٹی ہیلتھ ورکرز؛
• مہارتوں کے لحاظ سے کمیونٹی ہیلتھ ورکرز؛
• صحت کے حالات یا پروگراموں کے لحاظ سے کمیونٹی ہیلتھ ورکرز؛
• بنیادی ٹریننگ پر نئے کمیونٹی ہیلتھ ورکرز؛
• کمیونٹی ہیلتھ ورکرز کے لیے جاری ٹریننگ؛
• مینیجرز یا پروگرام کوآرڈینیٹرز؛
• ہسپتال کی انتظامیہ ٹیم؛
• صحت کی دیکھ بھال کرنے والی ٹیمیں - معالجین، مشاورتی نرسیں، میڈیکل سوشل ورکرز؛
• طبی سامان اور فارماسیوٹیکل ٹیم؛
• کمیونٹی لیڈرز۔

کمیونٹی کے واضح مقصد سے آپ کی ایڈمن ٹیم اور ممبرز کو یہ سمجھنے میں مدد ملے گی کہ کیوں کچھ گروپس کو شامل کیا جاتا ہے اور کچھ کو نہیں۔ مثال کے طور پر، اگر کمیونٹی کا مقصد خاندانوں کے لیے صحت کی تعلیم اور بنیادی نگہداشت کی خدمات فراہم کرنا ہے تو آپ کمیونٹی ہیلتھ ورکرز کے گروپس بنانے یا شامل کرنے کا فیصلہ کر سکتے ہیں جو ماں اور نوزائیدہ کی صحت، یا دماغی صحت سے متعلق مشاورت میں مہارت رکھتے ہیں۔ آپ کامیابی کی کہانیاں شیئر کرنے یا کمیونٹیز میں درپیش چیلنجوں کے حل پر بات کرنے کے لیے ایک گروپ کو بھی شامل کر سکتے ہیں۔ تاہم، اس صورت میں، سماجی گروپس کو اپنی کمیونٹی سے جوڑنا مناسب نہیں ہوگا۔

کمیونٹی ایڈمنز ایک محفوظ اور خوش آئند جگہ بنانے میں اہم کردار ادا کرتے ہیں جہاں ممبرز بات چیت کرنا چاہتے ہیں، اپنے چیلنجز کا اشتراک کرنا چاہتے ہیں اور اپنی کامیابیوں کا جشن منانا چاہتے ہیں۔ WhatsApp پر اپنی کمیونٹی کے لیے ایک اچھا ضابطہ اخلاق تیار اور نافذ کر کے، آپ ایک بااختیار اور احترام والے کلچر کو پروان چڑھا سکتے ہیں۔ ضابطہ اخلاق قوانین، اصولوں اور اقدار کا مجموعہ ہے جو آپ کی کمیونٹی کو اس طرز عمل اور مواد کو سمجھنے میں رہنمائی کرتے ہیں جن کی کمیونٹی میں حوصلہ افزائی کی جاتی ہے یا ان کی اجازت نہیں دی جاتی ہے۔

بڑے گروپس کا آن لائن نظم و نسق کرتے وقت بہت سے خطرات سے آگاہ ہونا ضروری ہے۔ اپنے گروپ اور کمیونٹی ایڈمن ٹیم کے لیے واضح رہنمائی فراہم کر کے اپنی کمیونٹی کو محفوظ رکھیں:

• گروپ انوائٹ لنکس اور نئے ممبرز - انوائٹ لنکس ایسے سیاق و سباق میں انتہائی کارآمد ثابت ہو سکتے ہیں جہاں پروگرام گروپس مسلسل تبدیل ہو رہے ہوں۔ تاہم، لنکس صرف پرائیویٹ پیغام کے ذریعے مطلوبہ گروپ کے ممبرز کو براہ راست بھیجے جانے چاہئیں، اس کے ساتھ ایک وارننگ ہو کہ لنک کو غیر متعلقہ رابطوں کو فارورڈ نہیں کیا جانا چاہیے۔ اپنی کمیونٹی اور گروپ ایڈمنز کی مدد سے نگرانی کریں اور کسی بھی ایسے رابطے کو فوری طور پر ہٹا دیں جسے آپ نہیں پہچانتے ہیں۔
• پرائیویٹ اور حساس معلومات شیئر کرنا۔ مثالی طور پر آپ کا ضابطہ اخلاق یا کمیونٹی کے قوانین ممبرز کو اپنی یا کسی کی ذاتی معلومات، جیسے کہ زمینی پتہ یا ای میل، اور کیس سے متعلق معلومات شیئر کرنے کی حوصلہ شکنی کرتے ہیں۔ ضابطہ اخلاق میں آپ گروپ ممبرز کو یاد دلانا چاہیں گے کہ کچھ معلومات بڑے گروپ کے ساتھ شیئر کرنا مناسب نہیں ہے۔ اگر حساس ذاتی معلومات یا تجربے کو سپورٹ گروپ کے حصے کے طور پر شیئر کیا جا رہا ہے تو ممبرز کو غائب ہونے والے پیغامات استعمال کرنے کا مشورہ دیں۔
• غلط معلومات۔ فرنٹ لائنرز کے طور پر، کمیونٹی ہیلتھ ورکرز کو اکثر اپنی کمیونٹیز اور فائدہ اٹھانے والوں میں غلط معلومات کا سامنا کرنا پڑتا ہے۔ اس بات کو یقینی بنائیں کہ آپ کی کمیونٹی اور گروپ ایڈمنز کو تربیت دی گئی ہے کہ وہ اپنے ممبرز کو یہ سمجھنے میں مدد کریں کہ حقائق کی جانچ کیسے کی جائے، اور پیغامات کو حذف کرکے غلط معلومات اور دھوکہ دہی کو بند کرنے کے لیے فوری کارروائی کریں۔ گروپ ایڈمنز عارضی طور پر "پیغامات بھیجیں" گروپ سیٹنگ کو "صرف ایڈمنز" میں تبدیل کرنے پر غور کر سکتے ہیں تاکہ ممبرز کو پیغامات بھیجنے سے روکا جا سکے۔
• تنازعات سے نپٹنا۔ شخصیات، عقائد، آراء اور توقعات میں فرق تنازعات کا باعث بن سکتا ہے، خاص طور پر جب کہ ممکن ہے کمیونٹی ہیلتھ ورکرز، ہیلتھ کیئر ٹیم، اور ہسپتال کے منتظمین کا تعلق مختلف کلچرز والی مختلف کمیونٹیز سے ہو۔ اپنے کمیونٹی کے اصولوں اور طریقوں میں تنوع کو فروغ دینا اور تنازعات سے نپٹنے سے متعلق رہنمائی اور ٹریننگ کے ساتھ گروپ ایڈمنز کو سپورٹ کرنا ضروری ہے۔

کمیونٹی ہیلتھ پر مبنی کمیونٹیز میں کمیونٹی اور گروپ ایڈمنز کی تقرری، ایڈمن ٹیم کے درمیان بات چیت اور ہم آہنگی اور گروپ ایڈمنز کو ان کے گروپس کے نظم و نسق کیلئے جوابدہ ٹھہرانے کیلئے ایک واضح فریم ورک ہونا چاہیے۔

یہ سب سے بہتر ہے کہ آپ اپنے مختلف ممبر طبقوں میں لیڈرز، مینیجرز، یا مخصوص کرداروں کے حامل افراد میں سے اپنے کمیونٹی ایڈمنز کو منتخب کریں - مثال کے طور پر، کمیونٹی ہیلتھ مینیجرز جن کے پاس مختلف مہارتیں ہوں، ہسپتال انتظامیہ کے ایگزیکٹوز، یا نرسنگ اسٹاف سپروائزر۔ بیک وقت، ان مہارتوں اور معلومات تک رسائی پر غور کریں جو ایک ایڈمن کو یہ یقینی بنانے کے لیے درکار ہوں گی کہ کمیونٹی میں مواصلت ممبرز کیلئے مؤثر اور قیمتی ہو۔ چونکہ ہر ایڈمن ٹیم کے ممبر کے پاس مختلف کام کا بوجھ اور صلاحیت ہو گی، یہ اچھا عمل ہے کہ کام کا بوجھ بانٹنے کے لیے کافی گروپ ایڈمنز کو بھرتی کریں، بہت زیادہ تھکا دینے والے کام سے اجتناب کریں، اور یہ یقینی بنائیں کہ آپ کی کمیونٹی پائیدار ہے۔ ہر گروپ کے لیے کم از کم دو کمیونٹی ایڈمنز اور دو گروپ ایڈمنز کا تقرر کرنے پر غور کریں، اور اپنی ایڈمن ٹیم کو ان کے کردار کو پورا کرنے میں بات چیت، ہم آہنگی اور مدد کے لیے ایک صرف ایڈمن گروپ قائم کریں۔

کمیونٹی اور گروپ ایڈمنز کو بھرتی کرتے وقت، ایسے افراد کی تلاش کریں جو:

• کمیونٹی کے مشن اور ضابطہ اخلاق کے لیے پرعزم ہوں؛
• دوستانہ، ملنسار، اور لچک رکھنے والے ہوں؛
• گروپس کو مربوط اور منظم کرنے کے لیے وقت اور صلاحیت رکھتے ہوں؛
• اپنے گروپس میں ممبرز کی مدد کرنے کے لیے صحیح تجربہ اور مہارت رکھتے ہوں؛
• سیکھنے، بہترین طریقوں، تصاویر، کہانیوں یا ڈیٹا پوائنٹس شیئر کرنے کے لیے آپ اور دوسرے ایڈمنز سے باقاعدگی سے بات چیت کرنے اور ملنے کا وقت رکھتے ہوں۔

اپنی کمیونٹی کو مشغول رکھنے کے لیے، یہ یقینی بنانا ضروری ہے کہ اعلان گروپ میں فراہم کردہ معلومات قیمتی اور ہر ایک کے لیے متعلقہ ہو۔ اس میں مندرجہ ذیل کے بارے میں اعلانات شامل ہو سکتے ہیں:

• حالیہ یا آئندہ کمیونٹی ہیلتھ ایجوکیشن، اسکریننگ، اور ویکسین کے ایونٹس؛
• صحت کی مقامی ایجنسیوں سے کمیونٹی کی صحت کی معلومات اور الرٹس؛
• نئے کمیونٹی ہیلتھ پروگراموں کے لیے تقاضے اور ٹریننگ؛
• کمیونٹی ہیلتھ ورکرز کی فلاح و بہبود اور معاون وسائل؛
• انفرادی کمیونٹی ہیلتھ ورکرز کی پہچان اور تعریف۔

کمیونٹی کے اندر مختلف گروپس کے مقصد پر غور کرنا اچھا عمل ہے۔ ان کے مقاصد پر منحصر، آپ گروپ ایڈمنز کے ساتھ کام کر سکتے ہیں تاکہ ان کی مواصلات کا فارمیٹ، فریکوئنسی اور مواد طے کر سکیں۔ یہ مندرجہ ذیل کاموں میں مفید ثابت ہو سکتا ہے:

• کمیونٹی ہیلتھ ورکرز گروپ کی میٹنگز یا مینٹرنگ سیشنز کے لیے شیڈول بھیجنا؛
• ریکارڈ رکھنے اور رپورٹ جمع کرانے کے لیے فارم اور یاددہانیاں بھیجنا؛
• بہترین طریقوں یا تجربات کا اشتراک کرنا جو کمیونٹی ہیلتھ ورکرز، فائدہ اٹھانے والوں اور مریضوں کی مدد کریں گے؛
• کمیونٹی ہیلتھ ورکر گروپس کو پیغام بھیجنا ان کی رائے طلب کرنے کیلئے یا ان کے اکثر پوچھے گئے سوالات کا جواب دینے کیلئے؛
• ہسپتال کی انتظامیہ کی ٹیم کے ساتھ کامیابی کی کہانیاں یا فوری درخواستیں شیئر کرنا؛
• صحت کی دیکھ بھال کرنے والی ٹیموں کو کمیونٹی کی صحت کے حالات اور مریضوں کے علاج سے متعلق رپورٹیں، سوالات اور درخواستیں بھیجنا۔

ذاتی رابطہ اور قدر شناسی اس بات کو یقینی بنانے کے لیے کلیدی حیثیت رکھتی ہیں کہ کمیونٹی ہیلتھ ورکرز کو احساس ہو کہ انہیں سپورٹ حاصل ہے اور وہ ترغیب یافتہ رہیں۔ اپنے ممبرز کو ان کے تعاون کے لیے @تذکرہ کرکے، اور کہانیوں اور تصاویر شیئر کرکے کامیابیوں اور ہائی لائٹس کا جشن منا کر ان کی تعریف کریں۔ ممبرز سے ان معلومات کے بارے میں رائے طلب کریں جو انہیں قیمتی معلوم ہوتی ہے اور وہ مزید کیا دیکھنا چاہیں گے۔ کمیونٹی اور گروپ ایڈمنز بھی صرف ایڈمن گروپ میں رابطہ کر سکتے ہیں تاکہ وہ شیئر کر سکیں کہ ان کے نزدیک کیا اچھا کام کر رہا ہے اور کیا نہیں، بات چیت کو زیادہ متعلقہ رکھنے کے لیے کن گروپس کو شامل یا ہٹایا جا سکتا ہے، اور آیا کچھ اعلانات کو گروپ میں بہتر طریقے سے ہینڈل کیا جاتا ہے یا کمیونٹی کی سطح پر۔